في مقولة بتقول: أفضل رد على السفيه الصمت.
وسليمان الحكيم في الأمثال بيقول: في أذني جاهل لا تتكلم.
لما باسمع أو باقرا الكلام دا, أول صورة بتيجي في ذهني عن السفيه أو الجاهل هي إنه شخص مستهتر, عشوائي, هدومه مبهدلة, شعره منكوش, مش متعلم, مش بيعرف يشتغل أو ينجح في أي حاجة بيعملها, بيتكلم بصوت عالي ومزعج وبطريقة مافيهاش لباقة .. إلخ
لكن الجاهل أو السفيه ممكن جداً يكون شخص شكله مهندم جداً, وقور, رزين, لبق في الكلام, ورأيي الشخصي إنه عادةً بيكون شخص كبير, واعي, مسؤول ممكن يكون مدير, رب أسرة, قائد ..
رأيي الشخصي (ودا مش تفسير للمقولتين اللي في الأول) أن السفيه والجاهل اللي المفروض ماردش عليه وألتزم بالصمت لو أنا في حوار معاه وفيه أختلاف بينا, هو الشخص اللي مش شايف أو مش عايز يشوف إن عنده مشكلة أو أنه غلطان وشايف أن الغلط عندي أو عند شخص غيره أو في الظروف أو في المجتمع أو أو .. لكن هو مش غلطان في أي حاجة.
رأيي إني ماحاولش أتكلم معاه لأنه مش شايف ومش عايز يشوف إنه غلط.
كل اللي أقدر أعمله (دا لو مش نافع ماتعاملش معاه أصلاً) إني أحمي نفسي من أي إزاء أو أساءة ممكن تحصلي منه لكن ماضيعش وقتي ومجهودي مع شخص مش عايز يشوف إنه غلطان في أي حاجة.
أصعب إنسان ممكن يتغيير للأحسن مش أشر إنسان في العالم, مش أكبر مجرم أو بطجي في العالم, مش صاحب أسوء سلوكيات في العالم.
لكن من وجهة نظري أصعب إنسان ممكن يتغيير للأحسن هو الشخص اللي مش شايف أو مش عايز يشوف إنه عنده مشكلة أو إنه محتاج يتغيير وهو دا في رأيي السفيه والجاهل اللي لازم التزم الصمت معاه.
ليست هناك تعليقات:
إرسال تعليق