أنا هنا.

كلنا بنعمل حاجات مختلفة عشان نتشاف.

إني أتشاف ويتشاور عليا ويكون في شخص أو أكتر بيعجب بيا دا إحتياج.

والاحتياج دا عند كل الناس.
ماظنش إن في إنسان هايضايق لو حد أعجب بيه أو مدحه أو مدح تصرفاته أو سلوكه أو حاجة معينة عملها.

والاحتياج دا كلنا بنتولد بيه, والمفروض يسدد لكل إنسان من وهو طفل صغير.
ولأن أغلبنا ماتسددش لينا الاحتياج دا في الطفولة بشكل كافي, فابنكبر وإحنا لسه عندنا نفس الاحتياج.

أكيد بيختلف حجم وشكل الاحتياج دا من شخص لشخص.
في ناس بتكتشف الاحتياج دا وبتحاول تتعامل معاه بطرق مختلفة وصحية حسب حجمه وشكله والاحتياجات التانية اللي معاه وحسب شخصية الإنسان نفسه.
وفي ناس بتفضل جعانة ليه وبتحاول تشبعه بطرق مختلفة مش صحيحة ومابتسددهوش برضه.

الإحتياج دا مش كارثة يعني، لكن المشكلة لما تكون تصرفاتي وسلوكي باعملها عشان أتشاف وعشان الناس تعجب بيا أو تمدحني، وأقول أن باعمل كده عشان مجد ربنا أو دا واجب ديني أو باعمل كده عشان مصلحة الوطن أو باعمل كده عشان أفيد البشرية أو أو ..

بصراحة الموضوع بيبقى سخيف ومقزز وبيبقى باين (لناس قليلة) إنه مزيف ومش حقيقي.
دا غير إني باقلل من قيمة الحاجة اللي باقول إني باعمل كده عشانها.

ياريتنا نفحص نفوسنا وتصرفاتنا ودوافعنا في كل حاجة بنعملها.
ومش كارثة لو إكتشفت بعد فحص نفسي إني باعمل كده عشان أتشاف لأن في رأيي إني أكتشف الحقيقة دي أفضل كتير من إني أكون مزيفة.