كنت قاعدة مع مجموعة من الناس , كنا حوالي 10 أشخاص تقريباً وكان في شخص بيحكي حكاية وكلنا كنا بنسمعه وكان بيتكلم عن واحدة وقال إسمها كذه مرة وبطريقة إنها حد معروف للمجموعة اللي بتسمع الحكاية.
أنا عن نفسي ماكنتش عارفة مين اللي هو بيتكلم عنها وتوقعت إني الوحيدة اللي مش عارفاها خصوصاً إن الشخص اللي كان بيتكلم مش قريب مني ومعرفش معارفه ولا أصدقاءه.
بعد ماخلّص الموقف اللي كان بيحكيه , شخص تاني من اللي في القاعدة (وهو يعتبر من أقرب الأشخاص في المجموعة للشخص صاحب الحكاية) سأله : مين بقى فلانة دي الي بتحكي عنها ؟
فسأله الشخص الأول : إنت مش عارفها ؟
جاوب التاني : لأ.
فقال شخص تالت في المجموعة : ولا أنا كمان أعرفها.
والرابع كمان ..
وهكذا إكتشفنا إن ولا واحد من المجموعة عارف فلانة دي اللي كان بيحكي عنها الشخص ده.
وكل واحد فينا كان فاكر إن هو الوحيد اللي مش عارف فلانة اللي في الموقف اللي بيتحكي.
والشخص ده ماكنش واخد باله إن كل اللي بيسمعوه ميعرفوش فلانة اللي بيتكلم عنها.
كان موقف مضحك وكلنا ضحكنا .. وقتها إفتكرت جزء من مسرحية إسمها وجهة نظر لمحمد صبحي.
أنا مش فاكرة المشهد قوي بس كل اللي أنا فاكراه إن كان في شخص تقريباً مدير أو مسؤول عن مؤسسة للمكفوفين وكان بيسأل المكفوفين أسئلة ويخد منهم الإجابات برفع إيديهم.
فسألهم سؤال وكانوا متفقين على الإجابة من قبل كده فكلهم رفعوا إيديهم.
فقاللهم : إيه ده واحد بس اللي رفع إيده ؟!!
فكل واحد فيهم إفتكر إن هو الوحيد اللي رفع إيده.
في مجتمعنا مش بسهولة نقول كلمة معرفش ..
يعني لو إنت في الشارع وسألت 5 أشخاص مختلفين عن إزاي تروح مكان معين غالباً حاتصل على 5 إجابات مختلفة ويمكن مافيش ولا إجابة منهم صح وكل واحد فيهم يحسسك إنه صح كإنه بيوصفلك بيته.
عدم المعرفة مش عيب ولا حرام .. العيب إني أظهر بعكس الحقيقة, بإدعاء المعرفة أو حتى بالسكوت.
الأفضل إني أقول ماعرفش لما أكون مش عارفة, مش بس أكتفي إني أسكت.
السكوت ممكن يضيع عليا فرصة إني أتعلم حاجة جديدة.
السكوت ممكن يخليني أفتكر إني الوحيدة اللي مش عارفة ويمكن ده مايكونش صح.
السكوت ممكن كمان يخلي لو في شخص مستغل ممكن يستغل سكوتي ويوهمني إني الوحيدة اللي مش عارفة أو إني الوحيدة المعترضة أو إني الوحيدة اللي مش مقتنعة فحين إن ممكن يكون في غيري كتير متفقين مع نفس رأيي بس ده مش واضح بسبب السكوت.
شوية أفكار قريبة من الفكرة دي :
اللي ساكت .. ساكت ليه ؟!
مجنون !
إنت المسؤول.
ليست هناك تعليقات:
إرسال تعليق