في مجتمعنا الشرقي "عيب" البنت تقول عايزة أتجوز لكن دا مايمنعش إن الجواز مطلب أو رغبة لأغلبنا إن ماكنش كلنا سواء ولاد أو بنات.
"دا للمتجوزوش يعني, مش عارفة المتجوزين رأيهم إيه؟ :)"
وأكيد الجواز هو حاجة جميلة.
جميل إن يكون في شخص بيشاركني الحياة.
شخص يفرح لفرحي ونجاحي.
شخص يساندني في متاعب الحياة.
شخص تربطني بيه مشاعر وأفكار وإهتمامات مختلفة.
- لكن .. إيه الدافع اللي يخليني عايزة أتجوز؟
غالباً الدوافع اللي بتدفع أغلبنا للجواز "عن غير وعي" هي تسديد احتياج
أو إحتياجات معينة من الاحتياجات الأساسية للإنسان.
زي: الاحساس بالأمان, القبول, الثقة, الإعجاب, المدح, التشجيع, الونس أو عدم الوحدة, الإهتمام, التقدير, القيمة "خصوصاً في مجتمع زي مجتمعنا الشرقي
اللي بيحط مثلاً قيمة البنت في الجواز"
لكن للأسف الدوافع دي مش صحية ولا تبني بيت أو جواز ناجح.
- طب إيه المشكلة يعني إن يكون دافع الجواز اللي عندي هو تسديد إحتياجي؟
جزء من المشكلة في رأيي إننا بندخل في العلاقة وكل واحد مستني من الطرف التاني
انه يسددله احتياجاته (الأساسية).
"وعادة بنعمل كدا من غير وعي"
فبتبقى علاقة مش صحية لانها مبنية على المنفعة أو المطالبة.
ولأن كل طرف بيبقى داخل العلاقة عشان يسدد احتياجاته فمش مرّكز في
تسديد احتياج الطرف التاني. "ودا
أصلاً مش دوره"
ومن هنا ممكن يبتدي جزء من المشاكل أو الصراعات في الإرتباط.
ولأن عادةً محدش بيقدر يسدد الاحتياجات الأساسية لأي شخص تاني.
لأن الاحتياجات الأساسية دي كانت المفروض تسدد لينا وإحنا أطفال
وللأسف ماتسددتش لأغلبنا.
فمهما حاول الطرف التاني تسديد الاحتياجات دي هايبقى تسديد مؤقت "دا لو إتسدد" لان الجوع
ليها أكبر من وجود شخص يسددها دا غير أن فعلاً دا مش دوره.
لأن تسديد إحتياجاتي مش هايجي غير من خلالي أنا, من داخلي أنا, مش من
أي حاجة خارجة عني.
طبعاً الكلام دا بيختلف من شخص لشخص ومن علاقة لعلاقة.
ولأن موضوع الاحتياجات دا موضوع كبير أوي مش ممكن يتغطى في بوست زي
دا.
وكمان موضوع الجواز موضوع كبير برضه ومش ممكن يتغطى في بوست زي دا.
لكن اللي عايزة أقوله باختصار هو:
لو ناوي تتجوز أو ترتبط فرأيي: إرتبط بالشخص اللي يناسب شخصيتك وأفكارك
وميولك مش الشخص اللي يناسب إحتياجاتك.
وقبل ما أدور على الشخص اللي يناسب شخصيتي أنا محتاجة الأول أعرف:
- إيه هي شخصيتي وإيه اللي يناسبها؟
- إيه هي احتياجاتي اللي ممكن تتدفعني للارتباط؟
محتاجة أسأل نفسي:
- إيه الدافع اللي عندي اللي يخليني أرتبط بالشخص دا بالذات؟
- إيه الاحتياج اللي عندي اللي بيخليني مدفوعة للدخول أو الاستمرار في
العلاقة دي؟
ولو ملاقيتش اللي يناسب شخصيتك مش مصيبة يعني.
لأن في رأيي إنك تعيش لوحدك وتصارع في الحياة ومع نفسك لوحدك رغم
صعوبتها دا أفضل بكتير من إنك تعيش عيشة مليانة صراعات مع طرف تاني.
أما بقى "لو" لاقيته فمبروك عليك :)
