للي بيحب الشتا.. :)

سؤال للناس اللي بتحب الشتا .. نفسي أفهم إنتوا بتحبوا فيه إيه ؟

كل ما قول لاحد إني مش بحب الشتا .. يستغرب قوي ويحسسني إني قولت حاجة غريبة جداً.
وكتير قوي قالولي : أنا أول مرة أشوف حد مش بيحب الشتا.
كذا حد قاللي : إنت مش بتحبي الشتا عشان إنتي مواليد شهر أغسطس يعني عز الحر.

ناس كتير بتقوللي : مشكلة البرد حلها سهل ألبس تقيل وتتحل المشكلة.
أنا مهما لبست هدوم كتيييير مش بدفى.
وبعدين في مشكلة تانية لو فرضت أني لبست هدوم كتير ودفيت هو أنا هافضل لبسه البس دا لأخر الشتا ؟!!
مانا أكيد هاغيره كل يوم , على الأقل مرة .. مرحلة التغيير دي بقى بتبقى صعبة قوي لكن دا مش بيحصل في الصيف.

ناس تانية تقوللي : مشكلة البرد حلها سهل .. شغلي دفاية هتلاقي المشكلة إتحلت.
برضه مش شايفة إن دا حل لأن الدفاية أكيد مش هاتكون معايا في كل أوضة وحتى لو في كل أوضة دفاية حتى المطبخ والحمام .. طيب بالنسبة للشارع والشغل والمحلات وأي مكان بره البيت.

المشكلة كمان إني لو متدفية من دفاية أو لابسى هدوم كتير وطلعت لأي مكان مفهوش دفاية أو غييرت لبسي أو قللت منه حاجة حتى لو كانت كوفية هاعيّى وده برضه مش بيحصل بالسهولة دي في الصيف.

دا غير طبعاً إن البرد بيخليني طول الوقت مكسلة أعمل أي حاجة.
وطول الوقت جعانة من كتر البرد.
وكمان لو هاصحى الصبح بدري باخدلي حوالي ساعة بعد ماصحى علشان أقدر أقوم من تحت البطاطين.
دا غير إن أغلب الشتا الدنيا بتكون مغيمة ومفيش شمس (وأنا بحب الشمس جداً).


بصراحة الحاجة الوحيدة اللي بتعجبني في الشتا إن اللبس يميل لإنه يكون كلاسيك ودي حاجة أنا بحبها .. لكن غير كدا بجد إيه الحلو في الشتا ؟!!