درس جديد

بالرغم من إن النجاح والقرارات الصائبة والخطوات الصحيحة ليها أهمية في حياة اللي بيوصلهم إلا إن المشاعر المؤلمة أو الفشل أو القرارات الخاطئة بتعلّم, بتسيب علامة أكبر.

مش بس الغلط بيعلّم يعني بيسيب علامة لكن كمان الغلط بيعلّم يعني بيديني فرصة إني أتعلم درس جديد.

في رأيي إن الألم بيعلّم أكتر من الرخاء. 

أكبر الدروس اللي إتعلمتها في حياتي كانت نتاج غلطات إرتكبتها أو قرارات خاطئة أخدتها أو مشاعر مؤلمة مريت بيها.

فرصة التعلّم أكبر في الشدّة أياً كانت الشدة دي أنا اللي متسببة فيها ولّا أشخاص غيري أو ظروف خارج إرادتي.

دي مش دعوة لإننا نغلط لكن .. 
لأننا بشر يعني أكيد غلطنا وبنغلط وهانغلط, ومع كل غلطة أو ألم أو دمعة في درس جديد .. وليك القرار إنك تتعلمه أو لأ.

شوية أفكار قريبة من الفكرة دي:
وقت صعب.
بكره أحلى.

بكره أحلى

بكره أحلى بغض النظر إيه اللي هايحصل فيه.

بكره أحلى عشان في فرصة جديدة أعرف نفسي أكتر.
فيه فرصة جديدة أعرف إلهي أكتر.
فيه فرصة جديدة أستمتع بالحياة وكل مافيها.

بكره أحلى عشان يمكن أشوف وشوش وقلوب جديدة.
وهاشوف برضه وشوش قديمة بس ينفع اشوفها بعين جديدة.
بكره أحلى عشان يمكن أفرق في حياة غيري.

بكره أحلى عشان لسه في شمس بتطلع.
لسه في طبيعة تخطف القلب والعين.
لسه في براءة الأطفال.
لسه في إنسانية حتى لو كانت ضئيلة ومشوهة بس لسه موجودة.
لسه في مزيكا تفرق في مودي.
لسه في فن لسه في إبداع.

بكره أحلى عشان هاكون كبرت يوم تاني.
بكره أحلى عشان يمكن أكتسب مهارة جديدة.
يمكن أتعلم درس جديد , يمكن يكون في تحدي جديد أقف قدامه وأعديه.

بكره أحلى عشان عيني لسه عايزة تشوفه أحلى.
بكره أحلى حتى لو فيه ألم .. ما الألم هو درس جديد .. والقرار في إيدي أتعلمه أو لأ.

مازلت شايفة بكره أحلى :)